LAOAG CITY – Inbatad ni Atty. Julius Balbas, ti comelec officer ditoy ciudad ti Laoag nga awan ti ited da nga extension iti daytoy maudin nga aldaw a panagrehistro dagiti botante.
Inlawlawag ni Balbas a mangrugi da nga agawat kadagiti mapan agparehistro iti oras ti alas-otso ita a bigat agingga intono alas-singko no malem.
Nupay kasta, kuna na a no makita da nga ado unay dagiti mapan agparehistro ket ag-cut off da iti oras ti alas-tres intono malem.
Mainaig ti daytoy, inpakaammo ni Balbas a sipud idi Hulyo ita a tawen agpapan ita ket umaboten iti agarop 2 ribo a botante dagiti napan nagparehistro.
Innayon na a manamnama nga ita nga aldaw a deadline ti registration ket umab-abot iti 300 agingga iti 500 a registrants ti mapan agparehistro isut gapuna a masapol a sapaen da ti mapan tapno maakomodar da amin.
