LAOAG CITY – Inbasura ti Commission on Elections Second Division ti election protest nga inpila ni dati a Mayor Michael Marcos Keon kontra ken ni Mayor James Bryan Alcid ditoy siudad ti Laoag.
Daytoy ti inpakaammo ni Atty. Ed Von Cid, City Administrator ti lokal a gobierno ditoy siudad ti Laoag.
Segun kenkuana, nakailanad iti certificate of finality nga awan pulos ti naipila a motion for reconsideration babaen ken ni dati a Mayor Keon kalpasan a nag-lapse wenno nagngudon ti aldaw a naited kenkuana a pawayway nga agpila.
Inbatadna a daytoy ti nagbalin pay a resulta ti saan a makaanay nga ebidensia tapno mangsuportar iti reklamo ni dati a Mayor Keon kontra ken ni Mayor Alcid.
Innayonna nga apaman a naawatda ti certificate of finality ket awanen ti plano nga agpila ti kaso ni Mayor Alcid kontra ken ni dati a Mayor Keon gapu kadagitoy a pammabasol no diket inpasingkedna nga isentrona ti imatangna ti trabahona kadagiti residente ditoy siudad ken ag-move on laengen.
