LAOAG CITY – Piliten ti Commission on Elections (Comelec) nga agparang ni suspended Bamban, Tarlac Mayor Alice Guo no bilang maipila ti election case kontra kenkuana.
Iti agdama, agtultuloy ti imbestigasion ti poll body mainaig iti kandidatura ti suspended Mayor idi 2021-2022 kalpasan a naibutaktak dagiti detalye ti mapagduaduaan a personalidad ken nasionalidadna.
Inlawlawag ni Commission on Elections chairman George Erwin Garcia a no sungbatan ti akusado dagiti alegasion kontra kenkuana ket masapul nga ag-file iti counter-affidavit ken saan a maaramid daytoy ti abogadona gapu ta masapul nga ag-file ken agsapata ti akusado iti kinapudno ti affidavit.
Gagem pay ti Commission on Elections a sarungkaran ti lokal a registrar ti Bamban, Tarlac a nangipilaan ni Guo iti certificate of candidacy na idi 2021 ken nangabak a Mayor iti eleksion idi Mayo 2022.
Karaman pay iti imbestigasion ti poll body ti panangsukimat iti dua a set ti fingerprint ni Guo iti database ti Commission on Elections a naala bayat ti napalabas a namindua a daras nga eleksion.
Innayonna, a kalikagomda pay nga iruar ti report ti komision mainaig iti kaso ni Guo sakbay a mangrugi ti certificate of candidacy filing inton Oktubre 1 agingga 8.
Iti agdama ket saan pay a masinunuo ti ayan ni Guo kalpasan a saan a natiliw idi inparuk-at ti Senate Sergeant at Arms ti arrest order kontra iti Mayor gapu iti saanna a panagatendar iti hearing mainaig iti raided POGO hub iti ilina idiay Bamban a nairaman iti illegal operations.
