LAOAG CITY – Inlawlawag ni Atty. Charito Malicad, mangidadaulo ti Communications and Media Office ditoy siudad ti Laoag nga awan ti kinapudnona ti isyu maipanggep iti maipagarup nga adda ti maysa nga empleado ti lokal a gobierno nga agsingsingir ti bayad kadagiti aglaklako iti Aurora Park.
Segun kenkuana, dagiti aglaklako iti Aurora Park ket dagiti babassit a negosiante wenno dagiti maibilang a Micro Small and Medium Entreprenuers.
Inbatadna a nangrugi daytoy a programa a “Gumatangkayon Food Fair” babaen iti inisyatibo ni Mayor Michael Marcos Keon tapno matulungan dagiti maseknan a negosiante a makarekobre manipud iti epekto ti COVID-19 pandemic.
Kunana a libre daytoy nga ididiaya ti lokal a gobierno ditoy siudad ti Laoag isu a masdaawda unay no apay adda ti timmaod a problema maipanggep iti nasao nga isyu.
Inpettengna nga awan ti asinoman nga empleado ti lokal a gobierno nga agkolkolektar ti bayad kadagiti aglaklako iti Aurora Park.
Kabayatanna, inpasingked ni Ms. Jerlin Soliven nga isuda ti maysa kadagiti mangkitkita ken mangbanbantay kadagiti Micro Small and Medium Entreprenuers no sadinno nga awan met dagiti naipadanon kadakuada nga aniaman nga arungaing.
Immuna iti daytoy, inpakaammo ti mangidadaulo ti Communications and Media Office ditoy siudad ti Laoag nga adda ti maysa a radio station ti nangirakurak nga adda ti maipagarup nga adda ti maysa nga empleado ti agsingsingir ti bayad kadagiti aglaklako iti Aurora Park banag a naigetda daytoy a naglikudan.
