LAOAG CITY – Sagsaganaanen ti Estados Unidos ti iduduprak ti naawagan kas “Monster Storm” a mangitunda ti napuskol a yelo.
Ti nasao a monster storm ket makaapektar iti dakkel a paset ti Amerika.
Manamnama a 16 a pulgada a kapuskol ti yelo nga addaan ti kalawa a dua a ribu a milya manipud iti Texas agingga iti New England.
Gapu iti daytoy, naruay a flights ti nakanselar kadagiti nagduduma a paset ti Estados Unidos.
Inbatad ni Homeland Security Secretary Kristi Noem a pina-activate-na ti National Response Coordination Center tapno imonitor ti bagyo ken agkiddaw ti federal support kadagiti naapektaran a lugar.
Naka-preposition metten ti 30 a generators, 250 a ribu a taraon, 400 a ribu a litro ti danum, ules ken dadduma pay a napapateg a kasapulan a banag.
Naiwaras pay ti tallo nga Incident Management Assistance Teams (IMATs) nga adda ti nayon a 15 a team a naka-standby pakairamanan ti 28 nga urban search and rescue team.
Kabayatanna, naideklarar ti State of Disaster Emergency kadagiti sumagmamano nga estado kas ti Kansas, Washington DC ken Philadephia.
