LAOAG CITY – Umannugot ti Department of Agriculture a ngumato pay ti bilang dagiti pork producer ken retailers a sumurot iti maipatpatungpal a Maximum Suggested Retail Price para iti karne ti baboy.
Segun ken ni Department of Agriculture Spokesperson Assistant Secretary Arnel de Mesa, iti agdama ket dumanon iti pakabuklan nga 88% ti compliance level dagiti pork producer idinto nga adda ti 40% met kadagiti retailers.
Inbatadna nga agtultuloy ti panangbantayda kadagiti trader, producer ken retailer ti nasao a produkto.
Gagem daytoy nga addang a siguradoen ti nalaka a presio ti karne ti baboy kadagiti tiendaan.
Mangestablisarda ti maysa a card a makatulong tapno maammoan dagiti paggapgapoan dagiti baboy nga ilaklako iti tiendaan.
Nagballaag met ni de Mesa kadagiti trader a saan a sumursurot iti Maximum Suggested Retail Price.
Iti kanito a mapaneknekan a saan dagitoy a sumursurot iti pagannurotan ket mabalin nga agresulta daytoy iti pannakaikkat ti shipping permit-da.
Banbantayan pay ti ahensia dagiti tiendaan a nangato ti presiona iti kada kilo ti baboy idiay Metro Manila.
