LAOAG CITY – Binabalaw ni Davao City 1st District Rep. Paolo Duterte ti House of Representatives kalpasan a nagkedked daytoy iti maikatlo nga impeachment complaint kontra ken ni Presidente Ferdinand Marcos Jr.
Iti maysa nga statement, inbatad ti agpanpanday linteg a maikanniwas iti Konstitusion ken insulto iti publiko ti nagbalin a tignay ti Kamara.
Inpettengna a saan a nainkalintegan ti palawag a saan a maawat ti reklamo gapu ta awan ti Secretary General iti pagilian gapu ta mabalin met daytoy nga awaten ti otorisado a tauhan iti opisina.
Inbatadna a saan a simple nga isyu ti proseso ti panagkedked no diket nairanta ti pananggandat a protektaran ti Presidente.
Kunana a ti impeachment ket responsibilidad ti Kamara ken saan a pribilehio.
Nangipeksa pay ni Duterte ti panagdanag gapu ta daytoyen ti maikadua a gundaway a pinagkedkedan ti Kamara ti impeachment complaint kalpasan ti reklamo ti Duterte Youth party-list iti napalabas a tawen.
Nagballaag ti agpanpanday linteg a ti pananglapped iti lehitimo a kaso usar ti nakapsot a rason ket mangpakapsot iti panagtalek ti publiko ken mangitunda ti panagatap iti panangidaulo ti Kamara.
Innayonna a nasken nga aramiden ti Kamara ti responsibilidad ken irespetar ti Konstitusion.
