LAOAG CITY – Inrakurak ni Ilocos Norte 1st District Representative Sandro Marcos a mangipila daytoy ti reklamo iti Office of the Ombudsman kadagiti kapitan nga agpabayad ti dokumento a masapol dagiti residente nga agpatulong iti opisinana.
Inbatadna a daytoy a banag ket nalawag a saan a nainkalintegan nga ar-aramiden dagiti opisial.
Inlawlawagna a daytoy ti rason no apay a nakapungtot isuna idi dimmanon daytoy a reklamo kenkuana.
Nupay kasta, inpalgakna a saanna metten a mabalin nga inaganan pay iti publiko dagiti madakdakamat a kapitan gapu ta mamati a dumalan daytoy iti umiso a proseso.
Maipalagip nga inpakaammo ti diputado a ti nasao a banag ket naipadanon iti opisinana banag a dagus met a nangisayangkat ti tignay tapno maliklikan ken malappedan nga adda ti mapasamak a kastoy a parikot dagiti umili.
