LAOAG CITY – Inpetteng ni Ilocos Norte 1st District Rep. Sandro Marcos a saan nga agpulpulitika mainaig kadagiti request iti opisina na manipod iti nagduduma nga ili wenno ciudad.
Reaksyon daytoy ni Marcos kalpasan ti panangipeksa ti mayor ditoy ciudad ti Laoag ti sakit ti nakem na gapu iti panangkwestyunar ti kongresista ti request da a 1-bilyon a pisos para iti maaramid a dalan nga agturong iti maar-aramid a mall ditoy ciudad ti Laoag.
Maipalagip a kwinestyunaran ni Marcos ti 1-bilyon a pisos a kiddaw ti gobierno lokal ditoy ciudad idinto a ti panangtingiting ti Department of Public Works and Highways ket umab-abot laeng ti 30-milyon a pisos ti magastos iti panagaramid ti kalsada nga agturong iti nadakamat a mall.
Gagem ti maaramid a kalsada ket tapno saan unay nga agirot ti trapiko iti Airport Road no mangrugin nga agoperar ti mall.
Naamoan a ti request ti ciudad ket naipasa paylaeng iti opisina ni Marcos idi Marso ita a tawen.
Nupay kasta, inlawlawag ni Marcos a ti budget season wenno ti panawen a panangadal da kadagiti request ti nagduduma nga ili ken ciudad ket mangrugi laeng iti Agosto wenno Setyembre a panaglukat manen ti sesyon kalpasan ti State of the Nation Address (SONA).
Immunan nga inlawlawag ti mayor ditoy ciudad a nagbalin a 1-bilyon a pisos ti balor ti maaramid a kalsada ket gapu ta kasapulan a gumatang da ti nayun a lote ken inkalintegan na a saan nga agderetso ti pondo iti ciudad nu diket iti mismo a Department of Public Works and Highways.
