LAOAG CITY – Manamnama a mangiparuk-at ti congressional committee ti subpoena kontra ken ni Ilocos Norte Governor Imee Marcos.
Daytoy ti inbatad ni Ilocos Norte 1st District Rep. Rudy Fariñas, majority leader iti kamara de representantes.
Kuna ni Fariñas a posible a mangiparuk-at ti nasao a komite iti subpoena no saan pay laeng nga agpakita ti gobernador iti maisayangkat nga imbestigasyon pakaseknan iti maipagarup a misuse of funds ti probinsiya iti excise ti tabako.
Impetteng ni Fariñas a dagiti inimbitaran da a saan nga agpakita iti sumaruno nga imbestigasyon da ket kapilitan a mangiparuk-at da iti subpoena.
Kuna pay ni Fariñas a ti mosyon ni Deputy Minority Leader Eugene de Vera tapno mangiparuk-at da iti subpoena kontra ken ni Marcos ket awan ti kimmontra kadagiti kakadua da iti kongreso.
Maangay ti sumaruno nga imbestigasyon inton Hulyo 25, 2017.
