LAOAG CITY – Nangipatulod ti Iran ti proposal iti Estados Unidos, iti babaen ti mediator a Pakistan, a gagem na nga ileppasen ti gubat iti nagduduma a paset ti Middle East.
Iti proposal ti Iran, inpetteng na ti pannakaikkat ti US Office of Foreign Assets Control (OFAC) sanctions iti Iranian oil sales iti uneg ti 30 nga aldaw ken ti pannakaileppasen iti naval blockade ti Amerika kadagiti pantalan.
Basar kadagiti report, karaman a kiniddaw ti Iran ti panangimanihir iti Strait of Hormuz no maipatungpal ti Estados Unidos dagiti partikular a commitment, a saan pay a naipublikar.
Nupay kasta, iti babaen ti Truth Social platform, naiget a kinontra ni US President Donald Trump ti counterproposal ti Iran.
Segun ken ni Trump, “totally unacceptable” dagiti kondisyon nga indasar ti Iran tapno malpasen ti gubat.
