LAOAG CITY – Nagun-od ti maysa a lalaki manipod iti Hungary ti Guinness World Record gapu iti kaado ti koleksyon na ti nakalata nga energy drink.
Ni Gergő Borbély ket addaan ti koleksyon nga umabot iti 2,000 energy drink cans.
Kuna na a rinugyan na ti energy drink cans idi 2008.
Inlawlawag na nga iti bolan ti Agosto 2008 ket nagpasar da ti nakabarbara a panawen isut gapuna a nagturong iti maysa a bassit a shop tapno gumatang ti nalamiis a mainom, ngem ti laeng adda ket ti energy drink.
Innayon na a damo na ti uminom ti energy drink iti dayta a gundaway, aginga nga in-inot metten a nagustwan na rason nga isu metten ti gatgatangen na iti inaldaw.
Gapu iti daytoy, napanunot na ti agkolektar agingga nga immabot iti 2 ribo ti koleksyon nga isu met ti inpadas na ng ilaban iti Guinness World Record, no sadinno a nagballigi a nanggun-od iti titulo para iti world’s largest can collection.
