LAOAG CITY – Balligi a naarestar ti maysa a construction worker iti asideg ti San Mateo Integrated School iti Barangay 52-A, San Mateo ditoy siudad ti Laoag babaen ti Anti-Illegal Drug Buy-bust Operation.
Nabigbig ti suspek a ni Windel Mag-Atas Santos nga ad-adda nga am-ammo iti awag a “Duds,” agtawen ti 36, naasawaan ken residente ti Sitio Camara, Barangay Colo iti siudad ti Batac.
Basar iti Laoag City Police Station, natiliw ti suspek kalpasan a maipagarup a naglako daytoy ti maysa nga heat sealed transparent plastic sachet a naglaon ti 1.1 a gramo a maatap a shabu iti maysa a police poseur buyer.
Malaksid iti daytoy, nakumpiskar dagiti otoridad manipud iti suspek ti dua nga heat sealed transparent plastic sachet ken maysa a resealable transparent plastic sachet a naglaon ti 2.6 a gramo a maipagarup a shabu nga agbalor ti 17,680 a pisos ken dadduma pay a drug paraphernalia.
Naala pay dagiti otoridad iti suspek ti maysa a calibre .22 pistol ken maysa nga empty magazine ti calibre .22 pistol.
Naammoan nga adda ti pakabuklan a 3.7 a gramo dagiti naala a droga nga agbalor ti 25,160 a pisos.
Kabayatanna, sumango ti suspek iti kaso gapu iti panaglabsingna iti Comprehensive Dangerous Drugs Act of 2002, Comprehensive Firearms and Ammunition Regulation Act ken COMELEC Resolution 11067.
