LAOAG CITY – Balligi a naarestar ti maysa a construction worker babaen ti Anti-Illegal Drug Buy-bust Operation iti Barangay 15 iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, ti suspek ket taga Barangay 8 San Rufino iti nasao met laeng nga ili.
Inbatadna a natiliw ti suspek kalpasan a maipagarup a naglako daytoy ti tallo nga heat sealed transparent plastic sachet a naglaon ti maatap a shabu nga agbalor ti dua a ribu a pisos iti police poseur buyer.
Malaksid iti daytoy, nakumpiskar pay manipud iti suspek ti dua nga heat sealed transparent plastic sachet a naglaon ti maipagarup a shabu.
Inlawlawagna nga adda ti agarup maysa a gramo ti kadagsen ti naala a mapapati a droga ken adda ti pakabuklan nga 6,800 a pisos.
Innayonna a maibilang ti suspek kas Street Level Individual ken Newly Identified Drug Personality.
