LAOAG CITY – Kinumpirmaran ni Police Captain Joseph Calderon, hepe ti PNP Dingras nga isagsagana da dagiti reklamo kontra ti natiliw a suspek seknan ti napasamak a pammaltog iti Sitio Nalasin, Brgy. San Mercelino iti nasao nga ili, pasado alas-nuebe idi rabii.
Kuna na a narekobre pay ti paltog a nausar iti nasao nga insidente ken inkiddaw na iti INPPO pannakaberipikar ti paltog no addaan ti lisensya.
Segun kenni Calderon, karaman iti insidente ti biktima a construction worker, idinto a ti suspek ket security guard iti Viking construction.
Inbunannag ti hepe nga adda ti immuna nga insidente a nakairamanan dagiti kasinsin ken anak ti suspek bayat ti papan da iti minatay iti kabagyan da.
Ditoy a dimteng met ti biktima ti pammaltog a maipagarup a nakainom ken dinangran na dagiti maseknan rason met a nagipulong ti anak iti ama na.
Kuna ni Calderon a dimmarup ti ama, a suspek ti pammaltog, ngem nabara iti panangkomprontar na rason a nakalbit na ti paltog.
Kabayatanna, inbatad ni Calderon a nagsagaba ti sugat iti akin kannigid a saka ti biktima ken dagus met a nakarwar daytoy iti ospital.
Innayon na nga agpada a nagipila dagiti maseknan iti reklamo kas iti panagipila ti reklamo ti suspek kontra iti biktima seknan ti physical injuries in relation to RA 7610 idinto a sanguen ti suspek ti reklamo a Frustrated Murder in relation to RA 10591.
