LAOAG CITY – Inpakaammo ni Mr. Cipriano Perry Martinez, General Manager ti Ilocos Norte Electric Cooperative wenno INEC a ngumato ti .53 centavos iti kada kilowatt hour ti presio ti kuriente ditoy probinsia.
Segun kenkuana, ti nasao a rate ket epektibo a mainayon kadagiti electric bill dagiti member-consumer-owners iti intero a probinsia manipud iti bulan ti Marso ken ita nga Abril.
Inbatadna a mangrugi a maawat dagiti member-consumer-owners ti kooperatiba ti electric bill dagitoy nga adda ti nayon a pannakaipangato ti presio ti kuriente inton bigat, Abril 9.
Inlawlawagna a ti nagbalin a rate ti Ilocos Norte Electric Cooperative idi Marso ket umabot iti 11.9016 idinto nga ita nga Abril ket 11.7246.
Mainaig iti daytoy, inpakaammo ni Martinez a ti projected rate ti Ilocos Norte Electric Cooperative ket piso ti mainayon a presio ti kuriente ditoy probinsia iti kada kilowatt hour ngem inkarigatanda ti nababbaba pay a presio daytoy.
Innayonna a malaksid iti agtultuloy a gubat iti Middle East ket maysa pay kadagiti kangrunaan a rason a ngimmato ti presio ti kuriente ditoy probinsia ket ti epekto ti foreign exchange rate.
