LAOAG CITY – Nangipatungpal ti Ilocos Norte Electric Cooperative wenno INEC ti mandatory shut off ti kuryente kadagiti sumagmamano a paset ditoy probinsia gapu iti Bagyo Kiyapo.
Segun ken ni General Manager Perry Martinez iti nasao a kooperatiba, naipatungpal ti mandatory shut off wenno ti panagpukaw ti serbisio ti kuryente kadagiti sumagmamano a barangay iti ili ti Bacarra, Banna, Currimao, Piddig, Pagudpud, iti siudad ti Batac ken ditoy siudad ti Laoag.
Nupay kasta, inbatadna a kaadoan kadagiti nadakamat a lugar ket nagsublin ti serbisio ti kuryente dagitoy.
Inlawlawagna a nangipatungpalda ti mandatory shut off gapu iti epekto ti kinapigsa ti tudo ken angin idi rabii gubuay iti Bagyo Kiyapo ken para iti kinatalged metten dagiti member consumer owners.
Kunana nga ikarkarigatan dagiti linemen ti Ilocos Norte Electric Cooperative nga iyurnos ken tarimaanen dagiti amin a linya ti kuryente tapno naan-anayen a maisubli ti serbisio ti kuryente iti kabiitan a panawen.
Innayonna nga adda ti binukelda a task force tapno mangkita kadagiti amin a lugar a naapektaran iti iduduprak ti Bagyo Kiyapo no sadinno nga amin a linemen ti kooperatiba ket naka-duty iti baet ti dakes a panawen.
