LAOAG CITY – Nagyaman ni General Manager Perry Martinez ti Ilocos Norte Electric Cooperative kadagiti Telecommunication Company kalpasan ti panagboluntarioda a mangi-urnos kadagiti service line-da sakbay ti nakaituding nga iskedyul ti pannakaituloy ti oplan baklas.
Nupay kasta, adda ti pammilin ken kalikagum ni General Manager Martinez kadagiti nasao a kompanya a no mabalbalin ket itultuloyda ti pannakitinnulongda iti Ilocos Norte Electric Cooperative INEC kadagiti naka-iskedyul nga operation baklas para ti alisto a pannakaisubli dagiti serbisio dagiti nasao a telecommunications.
Mangnamnama pay ni GM Martinez a dagiti Telco ken cable companies ket boluntario nga isayangkatda ti panangurnos ken panangtarimaan kadagiti wayada iti nasao nga operasion.
Maipalagip a nangrugin ti INEC a nangiwayat ti operation baklas idi napalabas a tawen ken ininot nga intultuloyda daytoy agingga ita tapno maurnos dagiti agsisirot ken matmatnag a waya a narisgo para kadagiti motorista ken aglabas a tattao.











