LAOAG CITY – Agtultuloy ti hot pursuit operation ti PNP Laoag iti suspek ti napasamak a pammagkong iti Sitio Lusong iti Brgy. 27 ditoy siudad ti Laoag.
Basar iti impormasyon nga inparuk-at ti PNP Laoag, ti suspek ket agtawen ti 40 a lalaki, construction worker ken residente iti Brgy. Nagpatpatan iti ili ti Solsona idinto a ti pimmusay a biktima ket nabigbig nga agtawen ti 24, baro, construction worker ken residente iti Sentro West, Ballesteros, Cagayan.
Iti naiyestablisar nga imbestigasyon ti PNP Laoag, aggi-inom ti biktima ken ti suspek ken dagiti dadduma a katrabahoan da iti construction idin ta adda ti nagbalin a riri iti nagbaetan dagitoy.
Gapu iti daytoy, inruar ti suspek ti kutsilyo na ken dita a binagko-bagkong na ti biktima a nagsagaba iti uppat a bagkong iti barukong ken takyag a nangitunda ti dagus a pannakatay na.
Kabayatanna, basar iti resulta ti eksamisyon iti bangkay ti biktima babaen kenni Dr. Renato Mateo ket hemoragic shock secondary to multiple stab ti rason ti pannakatay na.
Mainaig iti daytoy, rumrumuar ti nagbalin a riri ti suspek ken ti biktima ket adda pakainaigan na iti trabaho.
