LAOAG CITY – Maisagsaganan ti maipila a reklamo a panaglabsing iti RA 10591 wenno iligal a panagikot ti paltog ken bala kontra iti maysa a construction worker a subject ti search operation dagiti pannakabagi ti linteg iti ili ti Piddig.
Naiyuswat ti operasyon iti pagtaengan ni Leonel Dalao y Nonato, a residente iti Brgy. Ab-abut iti nasao nga ili.
Basar iti linaon ti search warrant, biroken dagiti otoridad ti Caliber 38 ken dagiti bala a mapapati nga ilemlemmeng ni Dalao iti bisinidad ti pagtaengan daytoy iti nasao a barangay.
Iti naiyuswat panagsukimat dagiti otoridad, narekobre da ti nasao a klase ti paltog ken tallo a bala a naipan iti nangisit nga sling bag.
Kabayatanna, inbatad ni Police Lt. Tolentino Erum, hepe ti Piddig Municipal Police Station, nga adda ti naireport kadakuada a nakakita nga agimimet ti paltog ni Dalao ken adda dagiti record iti Brgy. Ab-abut a mangriribok wenno mamkikabil ti maseknan.
Inlawlawag na nga adda ti gundaway nga agpaputok ti paltog ni Dalao bayat nga adda iti impluwensya ti nasanger ken masansan nga aggiinom da kadagiti barkada na.
Mainaig iti daytoy, narekobre ti nangisit nga slingbag iti kuarto a pagturturgan da iti nasao a pagtaengan.
