LAOAG CITY – Napaltogan ti maysa a construction worker babaen ti padana met laeng a construction worker a kinainumanna iti Barangay Turod iti ili ti Badoc.
Ti biktima ket agtawen ti 29 ken awanan asawa idinto a ti suspek ket naasawaan ken agpada dagitoy a residente iti nasao met laeng a barangay.
Basar iti Badoc Municipal Police Station, basar iti inwayatda nga imbestigasion, kabayatan nga agiinum ti biktima ken ti suspek ket kellaat nga adda ti saanda a panagkinnaawatan.
Mainaig iti daytoy, timmalaw ti suspek ngem idi nagsubli ket adda ti iggemna a maysa a paltog a revolver (357) ken inasitganna ti biktima.
Gapu iti daytoy, nagkabil ti biktima ken suspek a nangitunda ti pannakapaltog iti akinkannigid nga ima ti biktima.
Naarestar ti suspek ken nakumpiskar ti inusarna a paltog iti krimen idinto a naitaray ti biktima iti kaasitgan nga ospital para iti naan-anay a pannakatamingna.
Narekobre dagiti otoridad iti crime scene ti maysa a revolver S & W 357 Magnum nga adda ti kargana a dua fired cartridge cases len uppat a live cartridge cases para iti cal. 357.
Kabayatanna, naammoan a ti motibo iti insidente ket gapu iti saanda a panagkinnaawatan gapu iti kinabartekda.
