LAOAG CITY – Inpaganetget dagiti abogado dagiti biktima ti drug war iti International Criminal Court a sumrek iti legal criteria ti fitness ni dati a Presidente Rodrigo Duterte tapno sumango iti panangusig.
Iti obserbasionda iti naipila idi Setiembre 17, inbatad ti common legal representatives of victims wenno CLRV nga ‘unanimous’ ti nagbalin a findings ti panel ti medical experts, kabayatan ti sumagmamano a kondision a nakita iti panagsukimat nga adda kabaelan ni Duterte a makipaset iti trial.
Basar iti Counsel for Victims, awan pay nakita a baro nga ebidensia iti naisayangkat a medical evaluation idi Agosto 21.
Gapu iti daytoy, kunada nga adda umdas a pangibasaran ti International Criminal Court trial chamber tapno pormal nga ideklerar a fit to stand ni Duterte.
Nupay kasta, binigbig ti common legal representatives of victims ti rekomendasion dagiti eksperto para iti sumagmamano a reasonable accommodations tapno mapaalisto ti panagatenar ken partisipasion ni Duterte iti proceedings basta saan daytoy a makaapektar ti karbengan ti dadduma a participants ken iti naurnos a taray ti panangusig.
Kabayatanna, inkiddaw ti common legal representatives of victims iti trial chamber a pormal a mangiparuk-at ti finding a fit to stand trial ni Duterte.
