LAOAG CITY – Adda pay laeng ti panagamak dagiti residente a mapan kadagiti nagduduma a pasdek negosyo kas iti restaurant, parlor ken dadduma pay gapu iti agtultuloy a panagngato ti kaso to covid-19 ken agduduma a pangirigan dagiti executive officials idiay Amerika.
Daytoy ti report ni Bombo International Correspondent Rey Villanueva iti Los Angeles, California.
Inbaga ni Villanueva a ti kayat ti director ti Department of Health ket maiyalud-od pay laeng ti tallo a bolan a panagtalinaed iti uneg ti balay idinto a ni President Donald Trump ket kayat nan nga agsublin ti normal nga operasyon dagiti amin nga establisimiento gapu ti panagbaba ti ekonomiya idiay Amerika.
Gapu iti daytoy, kuna ni Villanueva a naiget a maipatpatungpal ti social distancing ken panagusar ti face mask no agturong kadagiti nagduduma a pasdek tapno saan nga alisto a makaptan ti virus.
Kabayatanna, iti interview ni Villanueva ken ni Engr. Leo Pacis, ti Consulting Engineer ti Home Builders idiay California, inbaga na a pabor iti kayat ni Pres Trump nga in-inuten nga aglukat dagiti negosyo iti intero nga Amerika.
Inlawlawag na a sipud nangrugi ti covid-19 pandemic ket saan latta a nagsardeng a nagtrabaho gapu ta ti negosyo da ket maibilang nga essential business.
Innayon na a patien na nga ado dagiti umili nga agprob-problema emotionally, physically ken financially kabayatan ti covid-19 pandemic.
Inadmitir ni Engr. Pacis a naapektaran met ti negosyo da gapu ta limitado laeng ti mabalin da nga aramiden.
