LAOAG CITY – Inpangaton ni United States President Donald Trump iti 15% ti global duty kadagiti maang-angkat a produkto idiay Estados Unidos, maysa nga aldaw kalpasan nga indeklarar nga ilegal ti United States Supreme Court ti dakkel a paset ti tariff program-na.
Iti Truth Social platform-na, inbatad ni Trump a kalpasan ti naiget a panangtingiting iti desision ti Korte Suprema nga inawaganna nga “extraordinarily anti-American,” inpangato ti administrasion ti import levies iti “fully allowed, and legally tested, 15% level.”
Immunan nga inrakurak ni Trump ti 10% a taripa kalpasan ti desision ti korte.
Kunana a kadagiti sumarsaruno a bulan ket agbiruk ti administrasionna ti dadduma pay a “legally permissible” a wagas tapno mangipatungpal ti nayon a taripa.
Basar iti White House, temporario laeng ti baro a 15% duty ken mabalin daytoy nga ipatungpal agingga iti 150 nga aldaw.
Adda dagiti exemption latta para kadagiti sumagmamano a sektor nga adda iti babaen ti agsina nga imbestigasion pakairamanan ti pharmaceutical products ken dagiti negosio a sakupen ti United States-Mexico-Canada trade agreement.
Daytoy nga addang ket kabaroan a tukad iti panagbalbaliw iti pagannurotan iti taripa ti administrasion Trump no sadinno a sumagmamano a daras a naikeddeng, binaliwan wenno inbabawi ti nagduduma a tukad ti buis kadagiti produkto nga ang-angkaten idiay Estados Unidos iti napalabas a tawen.
Maipalagip nga idi Biernes, iti butos a 6-3, nagdesision ti conservative-majority Supreme Court a ti linteg idi 1977 nga inusar ni Trump tapno mangipataw ti kellaat a taripa kadagiti sumagmamano a pagilian ket saan a mangipaay ti pammalubos iti Presidente tapno mangipatungpal ti nasao nga addang.
Naiget a kinontra ni Trump ti desision ken kunana a naibabain daytoy kadagiti sumagmamano a miembro ti korte uray dua kadagiti mahistrado ket isuna mismo ti nangdutok.
