LAOAG CITY – Saan a nagatendar ti 18 a dati a miembro ti Philippine Marines ita nga aldaw ti Lunes, Hunio 8 iti panagdengngeg ti Senate Blue Ribbon Committee iti babaen ti baro a Chairman daytoy a ni Senador Erwin Tulfo.
Basar iti Committee Secretary (ComSec), naimbitaran dagiti dati a suldado ngem awan ti naawat a sungbat ti Senado manipud kadakuada wenno kadagiti abugadoda a ni Atty. Levito Baligod.
Saan pay a nagatendar ni dati a Congressman Mike Defensor a basar iti Committee Secretary ket saan met a karaman kadagiti naipatulodan ti imbitasion.
Maipalagip nga iti panagdengngeg idi Hunio 4, rimmuar ti report a maipagarup a pinasuksukan ni Defensor ti 18 a dati a Marines tapno agtestigo iti isyu ti flood control anomaly banag a naiget a naglikudan ti dati nga agpanpanday linteg.
Kabayatanna, saan met a nagatendar da dati nga House Speaker Martin Romualdez, Rep. Zia Alonto Adiong, Rep. Jose Alvarez, Rep. Julienne Baronda ken Rep. Leila de Lima.
Iti surat nga inpatulod ni House Secretary-General Cheloy Velicaria-Garafil, irasrason ti Kamara de Representantes ti “parliamentary courtesy” iti saan a panagatendar dagiti agpapanday linteg.
Iti baet daytoy, intuloy ti panagdengngeg kaduana dagiti opisial manipud iti Department of Public Works and Highways, Department of Justice, Department of Budget and Management, Office of the Ombudsman ken ni National Bureau of Investigation Director Melvin Matibag kas resource persons.
