LAOAG CITY – Inbatad ti Philippine General Hospital, ita nga aldaw ti Lunes, Setiembre 14, a saan a kasapulan nga agtalined ni dati a House Speaker Martin Romualdez a naka-confine iti ospital.
Segun ken ni Dr. Gererdo “Gap” D. Legaspi a clinically stable ti dati nga Speaker.
Gapu iti daytoy, pinasingkedanna a mabalin a ma-discharge ni Romualdez iti ospital.
Nupay ti mapaspasaran a kondision ni Romualdez ket masapul iti panang-monitor ken treatment, saan a nasisita iti pannaka-confine-na daytoy, kabayatan a masigurado ti pannakaipaay ti medical care.
Naduktalan a ti agpampanday linteg ket adda 30 a porsiento ti tsansa a makapasar ti heart attack iti sumaruno a 30 a tawen wenno iti 3 a porsiento iti kada tawen.
Mainaig iti daytoy, kuna ni Legaspi a saan daytoy a nangato.
Naamoan nga adda 3 a porsiento agingga 5 a porsiento a tsansa a makapasar iti stroke.
Innayonna nga awan pakainaiganna iti major artery iti utak ngem small vessel disease laeng a gagangay no adda diabetis.
Binalakadanna ni Romualdez nga agusar iti CPAP machine gapu iti airway pressure no maturog ngem kunana a nagkedked ti opisial.
Malaksid iti daytoy, naduktalan ti Philippine General Hospital nga adda major depression ken anxiety ti dati nga Speaker ngem awan suicidal intent-na daytoy.
Nupay kasta, narekomendaran ti follow up ken monitoring-na iti risgo ken mood.
Maipalagip a manipud iti Cardinal Santos Medical Center iti San Juan City, naiyakar ni Romualdez iti Philippine General Hospital idi Sabado, Setiembre 12.
Dinutokan ti Sandiganbayan Third Division dagiti opisial iti Philippine General Haspital tapno ma-asses no nasapulan ni Romualdez ti medical confinement kalpasan iti pannakaisyu ti arrest warrant kontra kenkuana.
No saan, ma-detain wenno maibalud daytoy iti Quezon City Jail
