LAOAG CITY – Umabot iti 120 a mannalon nga agmulmula ti mais manipud iti nagduduma a barangay ditoy siudad ti Laoag ti nakipagpaset iti CP Seed Varietal Field Day, a naorganisar babaen iti panagtitinnulong ti LOTUS Company ken ti Office of the City Agriculturist (OCAg).
Basar iti Office of the City Agriculturist ditoy siudad ti Laoag, naipakita ti kababalin ken potensial dagiti nagduduma a barayti ti mais a patanur iti LOTUS Company tapno matulongan dagiti mannalon a mangpili kadagiti napintas a maimula a barayti para iti nasaysayaat a panagmula ken panagapit.
Kabayatanna, inpasigurado ti nasao nga opisina iti agtultuloy a panangpabilegda kadagiti mannalon babaen iti panangisuroda dagiti teknolohiya ken baro nga inobasion iti agrikultura para iti nasaysayaat nga apit ken ken dakdakkel a mapastrekan.
