LAOAG CITY – Inlawlawag ti Philippine General Hospital (PGH) a saan a naka-confine ni Leyte Representative ken dati nga House Speaker Martin Romualdez iti “presidential suite”.
Inbatad ni Philippine General Hospital spokesperson Dr. Jonas del Rosario nga awan ti “presidential suite” iti nasao nga opsital.
Kuna na a naka-confine ni Romualdez iti psychiatry ward ken ti us-usaren a kwarto ti dati nga speaker ket insagana da laeng kalpasan a napakaammoan ti nasao nga ospital.
Innayon na a ti napili ti kwarto ni Romualdez maibasar iti sumagmamano a konsiderasyon kas kadagiti sumaganad:
- Alisto a maipaayan ti seguridad gapu ta adda iti maudi a paset ti corridor iti 7th floor
- Saan a makaistorbo iti pannakaipatungpal ti nagduduma a serbisyo iti ospital
- Addaan ti umdas nga espasyo tapno maakomodar ti kasapulan a seguridad, equipment, ken personnel tapno mangipaay ti serbisyo ken eksaminasyon a kasapulan kas ti Dobutamine stress echo test
Naiyakar ni Romualdez iti Philippine General Hospital iti Manila manipod iti Cardinal Santos Medical Center iti San Juan City idi bigat ti Sabado, Setyembre 12.
Immuna iti daytoy, inbilin ti Sandiganbayan Third Division ti naan-anay a panangtingiting dagiti opisyal ti Philippine General Hospital ken ni Romualdez no kasapulan nga agtalinaed iti ospital kalpasan a naiparuk-atan ti arrest warrant gapu iti kaso na a plunder, wenno maipisuken iti Quezon City Jail.
Karaman kadagiti sakit a nadakamat dagiti doktor sagsagbaen ni Romualdez ket ti fluctuating blood pressure ken narisgo iti stroke.
