LAOAG CITY – Inrakurak ni Israeli Prime Minister Benjamin Netanyahu nga immannugotda ken ni United States President Donald Trump nga aniaman a pinal a katulagan iti Iran ket nasken a naan-anayen a malpas iti maipagarup a nuclear threat ti Islamic republic.
Inbatad ni Netanyahu a nakasaritana ni Trump idi Sabado ti rabii nga immunan nga inladawan ti Estados Unidos kas napintas a panagsinnarita.
Nadakamat a karaman iti katulaganda ti pannakaikkat ti uranium enrichment facilities ti Iran ken ti pannakaikkat ti enriched nuclear materials manipud iti teritorio daytoy.
Inpetteng ti Israeli leader nga agtaltalinaed nga agpada ti takderda ken ni Trump a nasken a saan a maaddaan ti nuclear weapons ti Iran.
Napagsaritaan pay ti dua a lider ti memorandum of understanding mainaig iti panaglukat manen ti Strait of Hormuz a maysa a napateg a ruta ti world business ti suplay ti langis.
Innayon ni Netanyahu nga agtultuloy a natibker ti alyansa ti Israel ken Estados Unidos nangruna ti maipapan iti seguridad ken depensa kontra kadagiti pangta iti rehion pakairamanan ti situasion idiay Lebanon.
