LAOAG CITY – Bimmaba ti 12.4 percent ti crime rates iti intero a pagilian idi 2025.
Basar iti datos manipod iti Directorate for Investigation and Detective Management, inbatad ti Philippine National Police (PNP) a nakairekord da ti 35,717 incidents ti focus crimes idi 2025, nababbaba no ikompara iti 40,771 a nairekord idi 2024.
Ti focus crimes ket pakairamanan ti murder, homicide, physical injury, rape, robbery, theft, ken carnapping.
Inpasingked ni PNP Chief Lt. Gen. Jose Melencio Nartatez Jr. nga ita a tawen 2026 ket ad-adda pay a paigetan da dagiti ipatpatungpal da nga addang tapno malapdan dagiti nagduduma a krimen, ken siguradwen a dagiti nagbasol ket mapatawan ti pannusa.
