LAOAG CITY – Naan-anayen a naglusulos iti pwesto ni Mr. Nestor Pedro kas mangidadaulo iti Civil Security Unit (CSU) ditoy ciudad ti Laoag.
Daytoy ti inbatad ni Miss Felicar Alba Ancheta, ti Human Resource Management Officer iti gobierno lokal ditoy ciudad.
Segun ken ni Ancheta, nagepekto paylaeng ti resignation ni Pedro idi Enero 1 ita a tawen.
Naamoan a sakbay a nagepekto ti resignation ni Pedro ket adda ti rimuar nga impormasyon a napatuludan daytoy iti ‘termination letter idi disyembre 31 iti napalabas a tawen ngem saanna a pinirmaan.
Saanen a naidetalye no apay a napatuludan ti termination letter ni Pedro ngem adda dagiti alegasyon kenkuana seknan ti maipagarop a panangparigat na kadagiti kameng ti Civil Security Unit (CSU) ken dadduma pay.
Rumrumuar a ti rason a nagresign ni Pedro ket gapu ta ag-schooling.
Nupay kasta, iti panagresign na ket maipagarop a saanna nga inturnover a naimbag ti opisina gapu ta nagtalinaed a nakalock daytoy.
Ginandat ti Bombo Radyo Laoag nga alaen ti takder ni Pedro ngem saanna a sungsungbatan ti tawag kenkuana.
