LAOAG CITY – Inpasingked ni ABC Federated Pres. Ryan John Pascua nga ad-adda pay a mapaigetan ti curfew hours kadagiti amin a barangay ditoy probinsia.
Segun kenkuana, kasapulan a naiget a maipatungpal daytoy ken nasken a mabantayan dagiti opisial ti barangay dagiti kabarangayanda iti oras iti panagruarda.
Inbatadna nga uray adda dagiti madutukan nga agbantay iti maysa a barangay no adda dagiti natangken ti ulona ket kakaasi met dagitoy a manganawa kadakuada.
Kunana a gapu iti daytoy ket rumbeng koma a paigetan dagiti barangay officials ti pannakaipakat ti nasao nga ordinansa tapno makita ti kinatalged dagiti residente.
Inlawlawagna a kanayonna nga ipalpalagip kadagiti padana nga ABC President a tungpalen koma dagitoy a pagalagadan tapno agtalinaed latta ti linak, urnos ken talna ti maysa a komunidad.
Inpanamnamana a babaen iti koordinasionda kadagiti kakaduana iti Liga ng mga Barangay ditoy probinsia ket makaipaayda iti napintas a serbisio.
Kabayatanna, mamati ni Pascua a daytoy ket dakkel a makatulong tapno malappedan ti panagngato ti bilang dagiti ubbing nga ina ken maliklikan ti aniaman a panagriri dagiti umili.
