LAOAG CITY – Inbilin ni Department of Agriculture (DA) Secretary Francisco Tiu Laurel Jr. ti National Food Authority (NFA) a rugianen ti pannakaikabil dagiti buffer stocks-da iti Visayas kas panagsagsagana ti pannakairubuat ti P20 iti kada kilo ti bagas a programa iti babaen ti departamento.
Segun iti sekretario, agpaut ti sumagmamano a lawas ti pannakaiyakar dagiti stocks dagiti bagas manipud iti National Food Authority warehouses kangrunanna dagiti aggapu iti paset ti Mindoro nga agturong kadagiti nagduduma a paset iti Visayas.
Sakbay iti daytoy, inpasigurado ti ahensia ti clearance iti panaglako dagiti bagas manipud iti Commission on Elections (Comelec) a paset ti campaign promise ni Presidente Ferdinand Marcos Jr. idi naelektaran daytoy idi tawen 2022.
Kabayatanna, dagiti buffer stocks a manipud idiay Mindoro ket maikabil kadagiti nagduduma a paset ti Visayas nga addaan ti limitado a produksion ti bagas kas ti Cebu, Negros Island, Samar ken Leyte.
Suportado met dagiti lokal a gobierno iti Visayas ti nasao nga inisyatibo ti Department of Agriculture ken nakasaganan a makipaset iti daytoy a programa.
