LAOAG CITY – Inrakurak ti Department of Agriculture (DA) a maminsan manen a makissayan inton Marso 31 ti Maximum Suggested Retail Price (MSRP) kadagiti imported premium rice ken maipababa iti P45 iti kada kilo gapu iti agtultuloy a panagbaba ti world price dagitoy.
Inbatad ni Agriculture Secretary Francisco Tiu Laurel Jr., bumaba iti agarup P19 iti kada kilo ti retail price dagiti imported rice maidasig iti dati a presio daytoy sakbay ti pannakaipatungpal ti Maximum Suggested Retail Price idi Enero.
Ti panagbaba ti nasao a presio dagitoy a manipud iti P49 iti kada kilo ket paset pay laeng ti inisyatibo ti departamento nga aramiden a nalaklaka a magatgatang kadagiti tiendaan nangruna kadagiti basic commodities kas ti bagas.
Kabayatanna, ti pannakaipatungpal ti Maximum Suggested Retail Price ket maysa a resulta ti konsultasion manipud kadagiti stakeholders iti industria tapno maipasigurado a ti panagkissay iti presio daytoy ket saan a makaapektar iti panaglako daytoy ken tapno saan met a makompormiso ti food security ditoy pagilian.
