LAOAG CITY – Rinugianen ti Department of Agriculture ti official rollout ti hybrid rice seeds a manamnama a mangparang-ay ti apit dagiti mannalon ditoy Ilocos Norte iti 15 a porsiento wenno innem a tonelada iti kada ektaria kabayatan ti panawen ti panagtutudo.
Adda ti 850 a rice farmers manipud iti ili ti Currimao ti manamnama nga umawat manipud iti Department of Agriculture Regional Field Office 1 hybrid rice seed agingga inton Hunio 19 ken sumarunonto pay dagiti dadduma pay nga ili.
Inbatad ni Ms. Leah Coloma, addan iti 88 a porsiento wenno agarup 2.6 a bilyon a pisos ti napalubosan para kadagiti serbisio a suporta ti produksion.
Ti kaudian a datos manipud iti Philippine Rice Research Institute (IRRI) ket mangipakita a nagun-od ti Ilocos Norte ti produksion ti bagas a 338,681 metriko tonelada idi 2023, nga addaan iti 65,069 nga ektaria a kalawa ti naapit ken apit a 5.18 metriko tonelada iti kada ektaria.
Basar met iti datos ti Philippine Statistics Authority (PSA) a 16.83 a porsiento ti kontribusion ti probinsia iti dagup a produksion ti bagas iti rehion uno.
Babaen ti National Rice Program ti Department of Agriculture, maikkan dagiti mannalon kadagiti de kalidad a bukel a maitutop iti lugarda iti umiso a tiempo para iti panawen ti panagtutudo.
Basar iti Department of Agriculture Regional Field Office 1, agdagup iti 355,742 a mannalon ti pagay iti rehion babaen ti Registry System for Basic Sector in Agriculture.
Dagitoy a mannalon ket kualipikado nga umawat ti tulong manipud iti Department of Agriculture ita a tawen nga addaan iti dagup a 2.9 a bilyon a pundo para iti programa ti pagay iti rehion uno.
Kabayatanna, agtultuloy ti pannakaiwaras dagiti hybrid seeds ken makaawat pay dagiti kualipikado a mannalon iti inorganic fertilizers, soil ameliorants ken bio fertilizers.
