LAOAG CITY – Nakitaripnong ni Department of Agriculture (DA) Secretary Francisco Tiu Laurel Jr. kadwa na dagiti regional managers ti National Food Authority (NFA) tapno masigurado dagiti kalidad ti bagas a mailaklako iti babaen ti programa ni Presidente Ferdinand Marcos Jr. a P20 iti kada kilo a bagas ken nakastrek iti high quality standards.
Segun iti sekretaryo, maysa a subsized programa ti P20 iti kada kilo a bagas a mangipaay ti oportunidad iti departamento a mabaliwan ti nabayagen a pangirigan ti publiko nga addaan ti nababa a kalidad dagiti bagas ti National Food Authority.
Kuna na a panawenen tapno naan-anay a mabaliwan ti opiniyon ti tattao maipanggep kadagiti bagas manipod kadagiti lokal a mannalon ken maipakita a kabaelan ti gobierno ti mangipaay ti high quality a bagas iti nababa a presyo.
Innayon na nga ipakpakita ti nasao a programa no kasanu ti kaimas ken kangato ti kalidad dagiti irik nga ap-apiten dagiti lokal a mannalon iti pagilian.
Kabayatanna, sipud nairubwat ti programa idi Mayo 1 ket adon dagiti consumers a nagyaman gapu iti napintas a kalidad dagiti bagas manipod iti National Food Authorirty.
