LAOAG CITY – Manamnama a matalantan inton sumaruno a lawas dagiti kontrobersial a nagan nga adda pakainaiganna iti maipagarup maanomalia a panagusar ni Vice President Sara Duterte iti confidential and intelligence funds-na.
Karaman dagitoy da Mary Grace Piattos, Milky Sikuya ken dadduma pay a nagan nga immunan a nadakamat idi inimbestigaran ti House Committee on Public Accountability and Good Government ti Intel fund ti bise.
Segun ken ni House Prosecutor Terry Ridon, amin a nagan a nainaganan ket maipagarup nagbalin a recipient wenno nakaawat ti intel fund no sadinno ket manamnama a matalantan iti Article I ti Articles of Impeachment.
Mainaig iti daytoy, planplanoen ti panel ti pannakairuar ti rekord dagiti nadakamat a nagan dagiti maipagarup sumagmamano nga indibidual babaen ti Philippine Statistics Authority (PSA)
Maipalagip nga immunan a sinertipikaran ti Philippine Statistics Authority dagiti kontrobersial a nagan nga awan iti database-da no sadinno ket awan pay ti nakitada a birth records dagiti nadakamat a nagan dagiti indibidual.
Immunan nga naamoan dagiti nadakamat a nagan dagiti sumagmamano nga indibidual kadagiti acknowledgment receipt nga inusar kas panangsuportar iti liquidation ti confidential funds ti Office of the Vice President ken ti Department of Education nga indauloan ni Vice President Sara.
