LAOAG CITY – Dakkel a karit para iti Ilocos Norte no kasano a matagiben wenno ad-adda pay a mapasayaat ti turismo.
Daytoy ti takder ni Gob. Imee Marcos kalpasan ti panangawatna itay kallabes iti Provincial Tourism Award.
Inannugotna a saanna a ninamnama ti panangipaay ti Rotary Club of Manila iti nasao a pammadayaw ditoy probinsia.
Nupay kasta, maragsakan ti gobernador gapu ta ipamatmat daytoy a nupay bassit ken saan a nabaknang ti Ilocos Norte ket mabalinen nga iyartap iti Ayala Corp. ken Diamond Hotel.
Iti baet daytoy, nagpalagip ti gobernador a pumigpigsa ti kompetision iti benneg ti turismo.
Ginutigotna dagiti kumapkapuy ti negosioda a mangkita iti wagas no kasanoda a mapasayaat ti negosioda tapno saanda a maudi kadagiti kabarbaro a negosio.
Malaksid iti daytoy, inbunannagna a masapul a mangpanunut ti probinsia kadagiti naidumduma nga “event” a mabalin a mainayon a pangawis kadagiti turista nga agsublisubli nga umay ditoy Ilocos Norte.
