LAOAG CITY – Ibilang ni Mr. Ronald Magaoay, maysa a mannalon ken mangidadaulo ti Duripes West Zanjera iti downstream iti North Main Canal iti ili ti Bacarra a palpak ti dam a proyekto ti National Irrigation Administration (NIA) iti Barangay Alsem iti ili ti Vintar.
Inlawlawagna a naragsak da apaman nga adda naipasdek a dam ngem idi nausar daytoy ket nakita da nga adu ti depekto na, rason a nangipasdek da manen ti sabali a dam ngem bassit met unay daytoy gapu ta ti laeng kabaelan na a suplayan ket agingga iti Barangay Nambaran, iti ili ti Bacarra.
Segun ken ni Magaoay a maymaysa laeng a construction firm ti nangkontrata iti tallo a dam a proyekto ti National Irrigation Administration ngem agpapan ita ket awan latta ti makadanon a danom iti lugar da.
Kunana nga umaboten iti sangapulo a tawen a problemada daytoy.
Innayonna a kalikagomda la unay a maikkan ti pokus ti problema da maipapan iti danom gapu ta adda da iti pungto, rason no apay a narigat a makadanon ti danom iti area da ken ti met laeng panagtalon ti pagbibiagan-da.
Mainaig iti daytoy, inpakaammu pay ni Magaoay a no mabalbalin ket saan da nga umanamong a makikappeng wenno makikadwa iti sabali a pederasyon gapu ta narigat la ngaruden a dumanon ti danom iti lugar da kasanu laengen no adda kagudwa da iti suplay ti danom.
Kagiddan iti daytoy, inbatad met ni Mr. Danny Calumpit, maysa a mannalon manipud iti Zanjera de Parang iti ili ti Bacarra a sayang laeng ti kwarta ti gobierno gapu ta palpak met dagiti ipaspasdek da a proyekto.
Patta-pattaen ni Calumpit nga umabot iti nasurok 300 nga ektarya iti downstream dagiti apektado a taltalon.
Kunana a adun dagiti naglabas a mangidadaulo ti sangera ngem agpapan ita ket awan pay ti nagbaliwan na.
Innayonna a saanen a kas idi napan a tawtawen ti 1980’s a ti kapigsa ti danom ket mabalin pay a dumanon iti ili ti Pasuquin.
Kabayatanna, mangnamnama daytoy nga ikaso kuma ti gobierno nangruna iti biang ni Presidente BongBong Marcos Jr. a masulosyonan iti kabiitan a panawen ti arunga-ingda.
Maipalagip nga immunan a nangipatulod da ti surat iti officer-in-charge ti National Irrigation Administration a ni Engr. Joselito De Vera tapno maidanon ti problema ti North Main Canal Federated Irrigators Association Incorporated (NMCFIAI) ngem agpapan ita ket awan pay ti sungbat ti ahensya.
