LAOAG CITY – Inpakaammo ni Ms. Jessamine Jimenez, Provincial Agrarian Reform Program Officer II ti Department of Agrarian Reform a manarimaan ti panangarisit ti opisinada kadagiti komunidad a mairaman iti Inclusive Partnerships for Agrarian Reform Communities project.
Segun kenkuana, daytoy a proyekto ket kas suporta kadagiti benepisiario ti Support to Parcelization of Lands for Individual Titling wenno SPLIT.
Inbatadna a ti nasao a programa ket sakupen ti 13 nga ili pakairamanan iti ili ti Piddig, Banna, Dumalneg ken dadduma pay.
Kunana nga adda ti nailatang a 22.2 bilyon a pisos a pundo para iti naan-anay a pannakaipatungpal ti programa.
Inlawlawagna a saan laeng a ti panagibunong ti titulo ti daga ti ipapaay ti opisinada no diket panangiwayat pay ti support services ken dadakkel a proyekto a pakabenepisiaran dagiti umili.
Innayonna a ti World Bank ti mangtingiting kadagiti agbalin a kualipikado a benepisiario iti nasao a programa ti Department of Agrarian Reform.
