LAOAG CITY – Inlawlawag ni Mr. Emir Neri Catbagan, alyas “Ka-Adam” dati a miembro ken lider ti Communist Party of the Philippines (CCP) ken ti armed wing na a New People’s Army (NPA) a saan a napintas ti nagbannagan ti pannaka-ikappengna iti makakannigid a grupo.
Segun ken ni Catbagan, 2011 idi agdama isuna lider dagiti estudyante iti maysa nga unibersidad ti San Fernando, La Union ket kas maysa a lider dagiti estudyante ket naruay dagiti nakipagpasetan na a seminars no sadinno a maysa ditoyen ti seminar dagiti makakannigid a grupo.
Kunana nga adda istilo nga awawagan dagiti makakannigid a grupo nga A.O.M wenno ti “Aroused, Organized and Mobilized” maysa a proseso ti panagrekrut.
Innayonna a dagiti makakannigid a grupo ket agus-usar ti propaganda tapno makapagrekrut da laeng.
Mainaig iti daytoy, inpakaammu ni Catbagan a gapu iti pinansyal a panagkasapulan idi agbasbasa isuna idi 2011 ken kalikagom na met ti makaturpos ket naallukoy ti rikna na a makisalip iti nasao a grupo.
Tawen 2018 ket nagbalin isuna a full time activist ti Communist Party of the Philippines (CCP) ken ti armed wing na a New People’s Army (NPA).
Inpakammu na pay a nalikaw na dagiti nagduduma a probinsya manipud La Union, Ilocos Sur, Ilocos Norte, Abra ken dadduma pay tapno laeng agrekrut kadagiti pada na nga estudyante.
Innayonna a ti kangrunaan a target da ket dagiti college students nga adda sakit nakem na, personal man wenno saan.
Inbatadna a dagitoy a klase ti estudyante ket isuda dagiti kadawyan a marekrekrut da sipud ta aramatenda ti emosyon dagitoy.
Ngem iti laksid a naallukoyen ti rikna na iti grupo, ket nagdesisyon daytoy nagikkat gapu ta idi immuli isuna iti kabambantayan tapno agsanay ket ditoy a naimatangan na dagiti saan a maiparbeng nga aramid ti grupo.
Sumagmamano kadagitoy ket ti panagpukan ti kayo ken panaganop ti endangered animals ken species.
Kunana a saan a nagduadua nga agikkat iti grupo gapu ta kamaudianna ket napanunot na met laeng ti masakbayan na.
Iti babaen ti tulong ti gobierno, ket pormal a nagikkat ni Catbagan iti Communist Party of the Philippines (CCP) ken ti armed wing na a New People’s Army (NPA).
Kabayatanna, indanon na ti panagyaman na iti gobierno kadagiti addang ken wagas nga ipatpatungpal da tapno matulongan dagiti pada na a nagbalin a biktima ti makin-kannigid a grupo.
Iti agdama ket maysa isuna itan nga agserserbi iti gobierno ken tumultulong kadagiti estudyante tapno saan da a makakappeng iti nasao a grupo.
