LAOAG CITY – Natiliw ti maysa a lalaki iti drug buy-bust operation nga inyuswat iti nagtitipon a pwersa iti PNP-Piddig ken PDEA iti Barangay Lioeng, Piddig, Ilocos Norte.
Nabigbig ti subject iti operasyon a ni Mr. Francis Albert Dumag, naasawaan ken residente met laeng ti nasao a barangay.
Segun ken ni Dumag, bayat ti panagin-indayon na iti sirok ti kayo iti chiko ket adda dagiti dimteng a pulis ken inakusaran da daytoy a naglako iti illegal a droga.
Inbatad na nga adda pay ti inpakita dagiti otoridad a ladawan na nga aglaklako iti illegal a droga ngem inpetteng na a saan nga suna ti adda iti ladawan.
Inadmitir na a dati a drug surrenderer ken nagus-usar idi ti illegal a droga ngem idi pay laeng 2014 nga insardeng na.
Kinumpirmaran na pay a nakasoan idin maipanggep iti illegal a droga ngem naibasura ti kaso na.
Inpasingked na a naminpinsanen a tinnallikudan na iti illegal a droga ken kas pammaneknek ket ti laengen mangas-asikaso kadagiti annak na ken dagiti taraken na a manok iti ar-aramiden na kadagitoy.
Innayon na nga awan ti kinatran-transakyon na gapu ta awan iti cellphone na.
Umabot iti maysa kilo a napagango a bulong ti marijuana ti nakumpiskar dagiti otoridad manipod ken ni Dumag.
