LAOAG CITY – Napilaan ti dua a kaso ti dati a Federal Bureau of Investigation Director a ni James Comey.
Daytoy ket babaen ti federal grand jury iti US state of Virginia nga adda ti pakainaiganna iti nagbalin a testimoniana nga inpaayna iti Kongreso.
Naakusaran ni Mr. Comey a nabayagen a mangkritkritikar ken ni United States President Donald Trump a nagulbod iti maysa a komite ti Senado idi 2020 no inotorisarna ti panagruar ti classified information iti media.
Iti panagsungbatna iti akusasion, ni Mr. Comey ket indeklararna ti bagina nga inosente ken kinunana nga addaan ti naiget a panagtalek iti federal judicial system.
Ti akusasion ket kalpasan ti sumagmamano nga aldaw nga inawagan ni Trump ti top law enforcement official ti pagilian nga ad-adda nga agresibo nga imbestigaren dagiti political adversaries-na iti pulitika pakairamanan ni Mr. Comey.
Naammoan a ti akusasion iti sistema ti hustisia ti Estados Unidos ket pormal a pammabasol nga inruar ti grand jury kalpasan a repasuenda dagiti ebidensia tapno maammoanda no rumbeng nga agtultuloy ti kaso.
Kabayatanna, mabalin nga umuna a panagpakita ni Mr. Comey iti Korte inton Biernes ngem ti pannaikaipila ti kaso kontra kenkuana ket pormal a mabasa iti sango ti maysa nga akusado iti Korte ket naikeddeng inton Oktubre 9 idiay Alexandria, Virginia.
