LAOAG CITY – Nasentensiaan ti pito a tawen a pannakaibalud ti korte iti Seoul ni Kim Keon Hee, asawa ni dati a Presidente Yoon Suk Yeol kalpasan a napaneknekan a naglabsing isuna iti panangawat kadagiti nababalor a regalo kasukat ti pabor iti pulitika kabayatan ken kalpasan ti panagserbi ti asawana.
Basar iti Seoul Central District Court, immawat ni Kim kadagiti alahas, nababalor a designer handbag ken dadduma pay a luxury items manipud iti sumagmamano nga indibidual a maipagarup a nagkiddaw ti tulong para kadagiti trabaho iti gobierno ken dadduma pay a pabor.
Inbatad ti korte a maipagarup nga inusarna ti impluwensiana kas First Lady tapno mangipaay kadagiti pabor ken oportunidad iti negosio.
Malaksid iti pito a tawen a pannakaibalud, namulta pay ni Kim ti 64.8 milyon won wenno sumurok-kumurang $42,000.
Inbilin ti korte ti panangkumpiskar kadagiti regalo a naawatna.
Karaman kadagiti ebidensia nga inawat ti korte ti nababalor nga alahas nga agbalor ti sumurok 100 milyon won a maipagarup nga inted ti maysa a negosiante kasukat ti trabaho para iti manugangna iti gobierno.
Maysa a pastor ti maipagarup a nangipaay kenkuana iti maysa a Dior bag ken dadduma pay a regalo kasukat dagiti pabor nga adda ti pakainaiganna iti responsibilidad dagiti opisial ti gobierno.
Naiget a naglikudan ni Kim dagiti pammabasol ken kinuna dagiti abugadona nga iyapelada ti desision ti korte.
