LAOAG CITY – Inbatad ni Atty. Jason Perera a maysa laengen a kaso ti nabati a sangsangwen ti kliyente na a ni dati a Mayor Jessie Ermitanio iti ili ti Marcos.
Segun ken ni Perera, kadagupan kadagiti naipila nga agsusukot a kaso kontra ken ni Ermitanio ket ti nabati ti maibilang a kalakaan gapu ta simple murder laengen no sadinno a ti maitudtudo a biktima ti dati a mayor ket ni retired Police Officer Conrado Agtarap.
Inlawlawag ni Perera a ti rumrumuar a motibo iti daytoy a kaso ket gapu ta maipagarop a ni Agtarap ket napigsa a kalaban ni Ermitanio iti kina-konsehal iti dayta a gundaway, banag nga ibilang ti abogado a nakakatkatawa ken “fussy excuse”.
Mangnamnama ni Perera a mawaya-wayaanen ni dati a Mayor Ermitanio iti kabiitan a panawen.
Maipalagip a karaman kadagiti immunan a naibasura a kaso kontra ken ni Ermitanio ket ti multiple murder no sadinno nga isuna ti maitudtudo nga utek iti pannakapapatay ni dati a Mayor Arsenio Agustin iti metlaeng ili ti Marcos.
Immunan nga inbatad ni Perera a naibasura met ti kaso ni Ermitanio seknan iti panagikot kadagiti naruay nga eksplosibo ken paltog gapu ta dagiti nakaalaan kadagiti ebidensya ket saan a sanikua ti dati a mayor no di ket kukua iti gobierno.
Ni Ermitanio ket nakabalud iti Bureau of Jail Management and Penolody (BJMP) ditoy ciudad ti Laoag sipud pay idi 2017.
