LAOAG CITY – Inpakaammo ni PMaj. Jephre Taccad, ti pannakangiwat iti Ilocos Norte Police Provincial Office a boluntaryo a simmuko ti dati a miembro ken ti Communist Terrorist Group (CTG) ken aktibo iti Alyansa Dagiti Mannalon iti Ilocos Norte (AMIN) iti Brgy. Cacafean iti ili ti Marcos.
Binigbig ni Taccad ti simmuko nga agtawen ti 39, awanan asawa ken residente iti nasao nga ili.
Inbatad na a daytoy ket recruit iti alyas “Ka Dino”, dati a commander ti Twenty-man Squad Fighting Unit babaen iti Franklin Areola Command nga agop-operar iti Marrag Valley, Apayao.
Inpakaammo ni Taccad a nakikappeng iti nasao a grupo idi 1985 ken simmuko idi 1999 iti maysa a parish priest ditoy siudad.
Nu pay kasta, nagbalin daytoy nga aktibo iti Communist Front Organization.
Kabayatanna, kuna ni Taccad a basar iti palawag ti maseknan a simmuko ket marigatan iti biag iti bantay rason a nagdesisyon nga agsubli iti sidong ti gobierno.
Ginutigot ni Taccad dagiti dadduma a rebelde a sumuko tapno maaddan ti baro a panagbiag.
Kabayatanna, inpetteng ni Mr. Genaro Dela Cruz, ti presidente ti Alyansa Dagiti Mannalon iti Ilocos Norte (AMIN) nga awan ti miembro da iti Brgy. Cacafean iti ili ti Marcos.
Inbatad na nga awan ti pagibasaran dagiti otoridad a pundo a miembro ti rebelde a grupo wenno aniaman a grupo dagiti simmuko.
Immunan nga inbunannag ni dela Cruz a saan a daytoy ti umuna a gundaway nga arig a nairaman iti red tagging ti nagan ti alyansa.
