LAOAG CITY – Maibilangen a resigned wenno nagikkaten iti serbisio iti Philippine National Police (PNP) ni dati a Philippine National Police Chief Nicolas Torre III kalpasan nga inawatna ti posision kas baro a General Manager ti Metropolitan Manila Development Authority (MMDA).
Nagsapatan ni Torre iti baro a posision daytoy idi Biernes, Disiembre 26, 2025.
Inbatad ni National Police Commission (Napolcom) Vice Chairman Rafael Vicente Calinisan, ti panagtugaw ni Torre iti Metropolitan Manila Development Authority ket mangipasimudaag ti “ipso facto resigned” wenno otomatiko a nagibbat iti puestona iti kapulisan.
Ti panagikkat ni Torre ket mangipaay ti wagas tapno agbalin a naan-anayen nga hepe ti Philippine National Police ni Lt. Gen. Jose Melencio Nartatez Jr. ken maalana met ti kangatoan a ranggo nga heneral a dati nga iggem ni Torre.
Ni Torre ti umuna nga alumnus ti Philippine National Police Academy a nangidaulo iti Philippine National Police a paset ti “Tagapagpatupad” Class of 1993.
Naam-ammo pay isuna iti sumurok tallo a dekada a serbisio iti kapulisan.
Nagbalin a mangidadaulo pay ni Torre iti Criminal Investigation and Detection Group (CIDG) a maysa kadagiti nagbalin a napateg a papelna.
Maipalagip a naaddaan ti saan a panagkinnaawatan ni Torre ken ti National Police Commission idi i-reshuffle ni Torre dagiti senior police officials.
Kabayatanna, agtultuloy koma ni Torre iti puestona kas Philippine National Police Chief no nagkedkedanna ti Metropolitan Manila Development Authority agingga a dumanon daytoy iti mandatory retirement age a 56 inton Marso 2027.
