LAOAG CITY – Inbasura ti Appeals Chamber ti International Criminal Court (ICC) ti apela ti kampo ni dati a Presidente Rodrigo Duterte a temporario a mawaya-wayaan iti pannakaibaludna gapu kadagiti kaso a crimes against humanity.
Gapu iti daytoy, agtalinaed iti pagbaludan ti dati a Presidente kalpasan a pinatibker ti International Criminal Court ti desision ti Pre-Trial Chamber 1.
Iti nagkaykaysa a butos ti lima a miembro ti Appeals Chamber, nagkedkedan dagitoy ti kiddaw ti depensa a baliktaden ti desision ti Pre-Trial Chamber 1 idi Enero 26 ken ibilin ti insigida a pannakawaya-waya ni Duterte.
Iti apela ti depensa, kunana nga inabuso ti Pre-Trial iti bileg a saan nga inikkan ti pateg ti report mainaig iti kasasaad ti salun-at ti dati a Presidente nga agtawenen ti 80.
Nupay kasta, inpetteng ti International Criminal Court, agsupadi ti argumento ti depensa, awan ti makitkita a nagdumaan ti Appeals Chamber iti nagbaetan ti Pre-Trial chamber rejection iti report ti Defense ken iti Pre Trial Chamber findings ken awan ti baro nga impormasion a mabalin a mabaliwan iti immuna a desision mainaig iti detention iti babaen ti Article 60 ti Rome Statute.
Inpaganetget ti Appeals Chamber a ti dua a report mainaig iti kondision ti salun-at ni Duterte nga insagana ti medical practitioners a pinili ti depensa ket inkonsiderar ti panel of experts.
Maipalagip a nakabalud ni Duterte iti International Criminal Court idiay The Hague sipud idi Marso 12, 2025 kabayatan nga agur-uray ti trial mainaig iti war on drugs idi isuna pay laeng ti Mayor ti Davao City ken Presidente ti Pilipinas.
