LAOAG CITY – Awan ti pagbabawyan ni dati a Presidente Rodrigo Roa Duterte kadagiti inparuk-at na a polisiya kabayatan ti administrasyon na.
Daytoy ti inpettengna iti senate hearing kabayatan ti imbestigasyon ti Senado iti drug war nga indauluan ni Senate Minority Leader Aquilino “Koko” Pimentel III.
Segun ken ni Duterte, inaramidna ti karbengan na, ken kas nagbalin a Presidente ti Pilipinas patien na a saan a napaay isuna a nangipatungpal ti maysa kadagiti adbokasiya na a mapkasiat ti illegal a droga ditoy pagilyan sipud idi nagkandidato idi 2016.
Inpettengna a ti war on drugs ket saan a panangpapatay kadagiti inosente no di ket panangprotektar kadagiti inosente gapu saan na nga inpalubos nga adda panagabuso nga aramiden dagiti kameng ti pulisya ken soldado.
Kunana a binilin na dagiti kameng ti pulisya a no man lumaban ken gandaten dagiti criminal a a lumaban ket saan da nga agpangadua a patayen dagitoy.
Mainaig iti daytoy, inbatad ti dati a Presidente nga akoen na ti responsibilidad dagiti pulis nga adda napapatay na apaman ti pannakaisayangkat ti war on drugs gapu ta inaramid da laeng ti pammilin na.
Kabayatanna, inpetteng ni dati a Pres. Duterte nga aramiden na amin a kabaelan na tapno protektaran ti pagilyan, maysa man isuna a kameng ti gobierno wenno private citizen.
