LAOAG CITY – Karaman ni dati a Presidente Rodrigo Duterte kadagiti abugado a manglaplapped iti impeachment ni Vice President Sara Duterte.
Basar iti kopya ti petision, karaman pay kadagiti abugado ni Vice President Sara ti biyenanna a ni Lucas Carpio Jr. ken dadduma pay a law firm.
Nangipila ti petition for certiorari and prohibition ni Vice President Sara idi Pebrero 18, pakairamanan ti panangkiddawna para iti temporary restraining order (TRO) ken writ of preliminary injunction tapno lappedan ti Senado iti panangisayangkat ti impeachment trial.
Kiniddawna pay iti Korte Suprema a mangiruar ti pinal a pammilin tapno maikkat ti maikapat nga impeachment complaint nga inaprobaran ti Kamara idi Pebrero 5 no sadinno a 215 nga agpanpanday linteg ti nagpirma iti reklamo.
Kabayatanna, ti petision ti Bise Presidente ket sabali pay ti immuna a petision nga inpila ti maysa a grupo dagiti abugado manipud idiay Mindanao iti kapada nga aldaw.
